ანგარიშგების წარდგენის პროცესი გრძელდება! გთხოვთ, წარმოადგინოთ ანგარიშგება დაუყოვნებლივ, ანგარიშგების ხელმისაწვდომობისთანავე

„ფასს სტანდარტები, მსს ფასს სტანდარტი და მმართველობის ანგარიშგება - მნიშვნელოვანი სიახლეები“ - სამსახურმა და ფასს ფონდმა ღონისძიება გამართეს

1 დეკემბერს, საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურმა და ფინანსური ანგარიშგების საერთაშორისო სტანდარტების ფონდმა (IFRS Foundation), რიგით მეექვსე ღონისძიება გამართეს, თემაზე: „ფასს სტანდარტები, მსს ფასს სტანდარტი და მმართველობის ანგარიშგება - მნიშვნელოვანი სიახლეები”. 

ღონისძიება ევროკავშირისა და მსოფლიო ბანკის ერთობლივი ფინანსური ჩართულობისა და ანგარიშვალდებულების პროექტის მხარდაჭერით ჩატარდა იმ საწარმოთათვის, რომლებიც ანგარიშგების მომზადებისას ფასს სტანდარტებს და მსს ფასს სტანდარტს იყენებენ. ღონისძიებას აღნიშნული საწარმოების                                                                     მომსახურე აუდიტორებიც დაესწრნენ.

ღონისძიებაზე აუდიტორია პირადად IASB-ისა და ფასს ფონდის წარმომადგენლებისგან გაეცნო სფეროსთან დაკავშირებულ მნიშვნელოვან სიახლეებს. შეხვედრას ბერტრან პერინი (ბუღალტრული აღრიცხვის საერთაშორისო სტანდარტების საბჭოს (IASB) წევრი) და ჯონათან ლაბრი (ფასს ფონდის კავშირებისა და ინტეგრირებული ანგარიშების მიმართულებების დირექტორი) წარუძღვნენ და მიმოიხილეს როგორც ფასს სტანდარტებსა და მსს ფასს სტანდარტში, ასევე მმართველობისა და ინტეგრირებული ანგარიშგების სფეროებში დაგეგმილი ცვლილებები. 

იხ. პრეზენტაციები: ბმული 1, ბმული 2, ბმული 3, ბმული 4.

აღნიშნულ ღონისძიებას, სამსახური და ფასს ფონდი, მსოფლიო ბანკის მხარდაჭერით უკვე მეექვსე წელია ატარებენ, რათა ხელი შეუწყონ საწარმოთა დროულ და უფრო სიღრმისეულ ინფორმირებას დაგეგმილ სიახლეებთან დაკავშირებით, რაც დადებითად აისახება ანგარიშგების ხარისხზე. სამსახური შეეცდება, აღნიშნული ღონისძიება, ტრადიციულად, მომავალ წლებშიც გაიმართოს და დამსწრეები არა მხოლოდ სფეროს მნიშვნელოვან სიახლეებს გაეცნონ, არამედ ჰქონდეთ შესაძლებლობა, რომ IASB-ისა და ფასს ფონდის წარმომადგენლებს პირადად დაუსვან კითხვები და კომპეტენტური პასუხები მიიღონ.