სამსახურის წარმომადგენლებმა საქართველო-ევროკავშირის ასოცირების ეკონომიკური და დარგობრივი თანამშრომლობის ქვეკომიტეტის სხდომაში მიიღეს მონაწილეობა

17 ივნისს, საგარეო საქმეთა სამინისტროს ორგანიზებით, ვიდეო-კონფერენციის ფორმატში, გაიმართა საქართველო-ევროკავშირის ასოცირების ეკონომიკური და დარგობრივი თანამშრომლობის ქვეკომიტეტის მე-2 თემატური ჯგუფის - „სამრეწველო და საწარმოების პოლიტიკა და სამთო-მოპოვებითი საქმიანობა; ტურიზმი; კორპორაციული სამართალი და კორპორაციული მმართველობა; მომხმარებელთა პოლიტიკა; საგადასახადო პოლიტიკა“ რიგით მე-6 სხდომა. 

ევროკავშირის მხრიდან შეხვედრაში მონაწილეობდნენ ევროკომისიის საგარეო ქმედებათა სამსახურისა და საქართველოში ევროკავშირის დელეგაციის წარმომადგენლები, ხოლო ქართული მხრიდან ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის, ეკონომიკისა და მდგრადი განვითარების სამინისტროს, ფინანსთა სამინისტროს, იუსტიციის სამინისტროს,  საქართველოს პარლამენტის, ტურიზმის ეროვნული ადმინისტრაციის, სააგენტო „აწარმოე საქართველოში“, ინოვაციებისა და ტექნოლოგიების სააგენტოს, წიაღის ეროვნული სააგენტოსა და კონკურენციის სააგენტოს წარმომადგენლები. 

სხდომაზე, დადებითი შეფასება მიეცა საქართველოს მიერ ევროკავშირთან დაახლოებისა და ასოცირების შეთანხმების განხორციელების თვალსაზრისით განხორციელებულ რეფორმებს, როგორც საკანონმდებლო ასევე ინსტიტუციონალური თავსებადობის მიმართულებით.  განსაკუთრებით აღინიშნა ბუღალტრული აღრიცხვისა და ანგარიშგების, სამთო-მოპოვებითი, ტურიზმის, საბაჟო, სამრეწველო და საწარმოების პოლიტიკის მიმართულებით მიმდინარე წარმატებული თანამშრომლობა.

აღსანიშნია, რომ საქართველო-ევროკავშირის ასოცირების ეკონომიკური და დარგობრივი თანამშრომლობის ქვეკომიტეტის მე-2 თემატური ჯგუფის შეხვედრა იმართება წელიწადში ერთხელ და მიზნად ისახავს საქართველოს პროგრესის შეფასებას ევროკავშირთან სექტორული ინტეგრაციის მიმართულებით.