მცირე და საშუალო აუდიტორული ფირმების მხარდასაჭერად, მსოფლიო ბანკმა ვებინარების სერია წამოიწყო

30 ნოემბერს, მსოფლიო ბანკისა და ევროკავშირის ერთობლივი ფინანსური ჩართულობისა და ანგარიშვალდებულების პროექტის ფარგლებში, მსოფლიო ბანკმა ვებინარი გამართა, თემაზე: „მცირე და საშუალო აუდიტორული ფირმების მომავალი: კრიზისიდან მიღებული გაკვეთილები და პრაქტიკის ტრანსფორმაცია".

აღნიშნული ღონისძიებით დაიწყო ვებინარების სერია, რომელიც მსოფლიო ბანკმა მცირე და საშუალო აუდიტორული ფირმების (SMP) მხარდასაჭერად შეიმუშავა. პანდემიის შედეგად შექმნილი რთული გარემოებები და ახალი გამოწვევები, რომლებიც SMP-ებზეც აისახება, სწრაფ რეაგირებას და გადაჭრას საჭიროებს. ამიტომ, პირველ ეტაპზე, მსოფლიო ბანკმა, საქართველოს აუდიტორული მომსახურების ბაზარზე პანდემიის გავლენის შესაფასებლად და მთავარი გამოწვევების ინდენტიფიცირებისთვის, აუდიტორებისა და აუდიტორული ფირმების გამოკითხვა ჩაატარა. 

გამოკითხვის შედეგებზე დაყრდნობით კი ვებინარების სპეციალური სერია შემუშავდა, რომელიც SMP-ებს არსებულ გარემოსთან ადაპტირებაში უნდა დაეხმაროს - ვებინარებზე მსმენელები სფეროს წამყვან სპეციალსტთა ცოდნას გაიზიარებენ და პანდემიის შედეგად შექმნილი კრიზისის დაძლევის საშუალებებს გაეცნობიან.

რიგით პირველ ვებინარზე, პოლ ტომფსონმა, მცირე და საშუალო ზომის საწარმოთა ბუღალტერთა და აუდიტორთა ევროპული ფედერაციის (EFAA) დირექტორმა, იმ ტრანსფორმაციაზე ისაუბრა, რომელიც SMP-ისთვის აუცილებლობად იქცა არსებულ კრიზისულ გარემოში. კერძოდ, მან ციფრული ტექნოლოგიების სწრაფი დანერგვისა და ბიზნესის დივერსიფიკაციას მნიშვნელობაზე იმსჯელა. 

აუდიტორიის წინაშე წარდგნენ, ასევე, კრისტოფერ არნოლდი, ბუღალტერთა საერთაშორისო ფედერაციის (IFAC) კვლევისა და SME/SMP-ის განყოფილების ხელმძღვანელი და ალექს ფილი, IFAC-ის SMP-ის კომიტეტის წევრი. მათ მოახდინეს იმის დემონსტრირება, თუ როგორ შეუძლია ქართულ SMP-ებს აღნიშნული ტრანსფორმაციის განხორციელება IFAC-ის მიერ გამოქვეყნებული სახელმძღვანელოს - „პრაქტიკის ტრანსფორმაციის სამოქმედო გეგმა - მომავლის გზამკვლევი” - დახმარებით. 

იხ. პრეზენტაცია. 

იხ. ვებინარის ჩანაწერი ჩვენს YouTube არხზე. 

მსოფლიო ბანკის მიერ დაგეგმილი ვებინარები ამ სერიიდან სამსახურის ვებგვერდზე დაანონსდება.