IFIAR-ის აუდიტის ინსპექტირების მეთოთხმეტე სემინარი აშშ-ში გაიმართა

2020 წლის 4-6 თებერვალს, აშშ-ში აუდიტის დამოუკიდებელ საზედამხედველო ორგანოთა საერთაშორისო ფორუმის (IFIAR) აუდიტის ინსპექტირების რიგით მეთოთხმეტე სემინარი გაიმართა. სემინარს, სხვა წევრ ქვეყნებთან ერთად, მსოფლიო ბანკის მხარდაჭერით, საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის წარმომადგენლებიც დაესწრნენ. 

სემინარი IFIAR-ის სამუშაო ჯგუფის ორგანიზებით ყოველწლიურად იმართება წევრი ქვეყნების წარმომადგენლებისთვის. მისი მთავარი მიზანი აუდიტის ინსპექტირების ძლიერი და მდგრადი მოდელის ჩამოყალიბებაა აუდიტის ხარისხის გაუმჯობესებისთვისა და ინვესტორების დაცულობის უზრუნველსაყოფად. აღნიშნული სემინარი ქმნის პლატფორმას, რომლის მეშვეობითაც წევრი ქვეყნები ერთმანეთს გამოცდილებას და პრაქტიკას უზიარებენ აუდიტორული ფირმების ინსპექტირების კუთხით. ინფორმაციის მსგავსი მიმოცვლა და საუკეთესო პრაქტიკების გამოვლენა, ზედამხედველ ორგანოთა საქმიანობას უფრო კონსისტენტურს და ეფექტურს ხდის.

სემინარი IFIAR-ის საქმიანობისა და სამომავლო გეგმების მიმოხილვას დაეთმო. დამსწრე აუდიტორია ასევე აუდიტის საკვანძო საკითხებთან დაკავშირებულ ინოვაციებს გაეცნო - გამომსვლელებმა მათ სფეროსთან დაკავშირებული სიახლეები, კერძოდ, მონაცემების ანალიზის თანამედროვე მიდგომები და პროფესიაში ხელოვნური ინტელექტის გამოყენების სარგებელი გააცნეს.