მეოთხე კატეგორიის საწარმოებისათვის ფინანსური ანგარიშგების სტანდარტის შემუშავების პროცესი აქტიურ ფაზაში გადადის

29 მარტს, ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის მონაწილეობით, ბრიტანეთის მთავრობის მიერ კარგი მმართველობის ფონდის (The Good Governance Fund) ფარგლებში ინიცირებული ტექნიკური დახმარების პროექტის პრეზენტაცია გაიმართა. შეხვედრას დაესწრნენ საქართველოს სამთავრობო უწყებების, ბიზნეს ასოციაციების, საბანკო სექტორის, არასამთავრობო ორგანიზაციების, პროფესიული საზოგადოებისა და აკადემიური წრეების წარმომადგენლები.

პრეზენტაციის მიზანს წარმოადგენდა „ფინანსური ანგარიშგება IV კატეგორიის საწარმოებისთვის” პროექტის დაინტერესებული მხარეების ფართო ჯგუფისთვის გაცნობა, რეფორმის სარგებლიანობის, მოცემული ეტაპისთვის შესრულებული სამუშაოსა და დასახული გეგმების განხილვა. შეხვედრა გახსნეს ფინანსთა მინისტრის მოადგილემ  ნიკოლოზ გაგუამ, სამსახურის უფროსმა იური დოლიძემ და ბრიტანეთის საელჩოს რეგიონული პორტფოლიოს ხელმძღვანელმა ბენ ლუკოკმა. აღინიშნა, რომ ევროკავშირისა და მსოფლიოში საუკეთესო პრაქტიკის გათვალისწინებით გამარტივებული ფინანსური ანგარიშგების სტანდარტის დანერგვა, ამ ზომითი კატოგორიის საწარმოებს ხელს უწყობს  საკრედიტო რესურსებზე ხელმისაწვდომობის უზრუნველყოფასა და ბიზნესის ზრდაში.

აუდიტორიის წინაშე პრეზენტაცით წარდგა „კარგი მმართველობის ფონდის“ პროექტის ჯგუფის ხელმძღვანელი მაიკლ ველსი, მცირე და საშუალო ბიზნესის ფინანსური ანგარიშგების სტანდარტების შემუშავებისა და დანერგვის ექსპერტი, რომელიც წლების განმავლობაში ხელმძღვანელობდა ფინანსური ანგარიშგების საერთაშორისო სტანდარტების საბჭოს განათლების მიმართულებას. მაიკლ ველსი წარმოდგენილია რიგი ავტორიტეტული საერთაშორისო ბუღალტრული ორგანიზაციების კომიტეტებსა და სამუშაო ჯგუფებში.

ღონისძიების დასკვნით ნაწილში დისკუსია გაიმართა, რომელშიც მონაწილეობა მიიღეს სამსახურის, სავაჭრო-სამრეწველო პალატის, შემოსავლების სამსახურის, საკრედიტო ბიუროს, ბანკისა და საკონსულტაციო კომპანიის წარმომადგენლებმა და გენდერული თანასწორობის ექსპერტმა. მათ რეფორმის მიზნებზე ისაუბრეს და პროექტის მიმდინარეობა შეაფასეს. დამსწრე საზოგადოებას შესაძლებლობა მიეცა კითხვებით მიემართა სამსახურის წარმომადგენლებისთვის და დისკუსიის მონაწილეებისთვის.

ღონისძიებას წინ უსწრებდა პროექტის ფარგლებში შექმნილი საკონსულტაციო ჯგუფის ორდღიანი სამუშაო შეხვედრები, რომელიც მიზნად მეოთხე კატეგორიის საწარმოებისთვის განკუთვნილი სტანდარტის ძირითადი პრინციპების განხილვას ისახავდა. საკონსულტაციო ჯგუფის შემადგენლობაში შევიდნენ შემოსავლების სამსახურის, მსხვილი ბანკების, პროფესიული და აკადემიური სექტორის წარმომადგენლები.

იხილეთ პრეზენტაციები ქართულად და ინგლისურად.