ანგარიშგების წარდგენის პროცესი გრძელდება! გთხოვთ, წარმოადგინოთ ანგარიშგება დაუყოვნებლივ, ანგარიშგების ხელმისაწვდომობისთანავე

IFIAR-ის აუდიტის ინსპექტირების მეთხუთმეტე სემინარი ვირტუალურად გაიმართა

2021 წლის 23-25 მარტს, აუდიტის დამოუკიდებელ საზედამხედველო ორგანოთა საერთაშორისო ფორუმის (IFIAR) აუდიტის ინსპექტირების რიგით მეთხუთმეტე სემინარი ვირტუალურ რეჟიმში გაიმართა. სემინარს, IFIAR-ის სხვა წევრ ქვეყნებთან ერთად, ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურის წარმომადგენლებიც დაესწრნენ. 

სემინარი IFIAR-ის სამუშაო ჯგუფის ორგანიზებით ყოველწლიურად იმართება. მისი მთავარი მიზანი აუდიტის ინსპექტირების ძლიერი და მდგრადი მოდელის ჩამოყალიბებაა აუდიტის ხარისხის გაუმჯობესებისთვისა და ინვესტორების დაცულობის უზრუნველსაყოფად. აღნიშნული სემინარი ქმნის პლატფორმას, რომლის მეშვეობითაც წევრი ქვეყნები ერთმანეთს გამოცდილებას და პრაქტიკას უზიარებენ აუდიტორული ფირმების ინსპექტირების კუთხით. ინფორმაციის მსგავსი მიმოცვლა და საუკეთესო პრაქტიკების გამოვლენა, ზედამხედველ ორგანოთა საქმიანობას უფრო კონსისტენტურს და ეფექტურს ხდის.

მიმდინარე წელს, სემინარი ისეთი საკითხების განხილვას დაეთმო, როგორიცაა ფულის გათეთრებასთან დაკავშირებული რისკები, ჯგუფის აუდიტი და ხარისხის მართვის საერთაშორისო სტანდარტები; სემინარზე მომხსენებლებმა ასევე მიმოიხილეს გარკვეული ფასს სტანდარტების ცალკეული განყოფილებების მიმართება პანდემიის მიერ შექმნილ გარემოებებთან. კოვიდ-19-ის გავლენა აუდიტორული ფირმების ხარისხის მართვის ჭრილშიც იქნა განხილული.