სამსახურმა კავკასიის უნივერსიტეტის მიერ გამართულ საერთაშორისო კონფერენციაში მიიღო მონაწილეობა

25 ივლისს საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურმა მონაწილეობა მიიღო კავკასიის უნივერსიტეტის მიერ ორგანიზებულ საერთაშორისო სამეცნიერო-პრაქტიკულ კონფერენციაში, თემაზე – „გაზრდილი გამჭვირვალობა და ფინანსური ინფორმაციის ხელმისაწვდომობა: ახალი შესაძლებლობები აკადემიური საზოგადოებისათვის და სხვა დაინტერესებულ მხარეთათვის საქართველოში". 

კონფერენციაზე სამსახურის წარმომადგენელმა ისაუბრა ანგარიშგების რეფორმის მიმდინარეობაზე, არსებულ გამოწვევებსა და მიღწევებზე.

კონფერენციის საერთაშორისო მომხსენებლებს შორის უნდა აღინიშნოს ჟაკ პოტდევინი (ბუღალტრული აღრიცხვის, ანგარიშგებისა და აუდიტის რეფორმების მხარდაჭერის ეროვნული ფონდის პრეზიდენტი, ბუღალტერთა საერთაშორისო ფედერაციის ნომინაციის კომიტეტის წევრი), პოლ ტომპსონი (ბუღალტრული აღრიცხვის, ანგარიშგებისა და აუდიტის რეფორმების მხარდაჭერის ეროვნული ფონდის მრჩეველთა საბჭოს წევრი, მსს ბუღალტრების და აუდიტორების ევროპული ფედერაციის დირექტორი), ერიკ ვერმეულენი (ტილბურგის უნივერსიტეტის ბიზნეს სამართლის პროფესორი, მსოფლიო ბანკის ანგარიშგების და გამჭვირვალობის ექსპერტი) და იოჰენ ციმერმანი (ბრემენის უნივერსიტეტის ფინანსური აღრიცხვის პროფესორი), რომელთაც ისაუბრეს გლობალურ ტენდენციებზე, ინტეგრირებულ ანგარიშგებაზე, გამჭვირვალობის მნიშვნელობაზე და მონაცემების გამოყენების პერსპექტივებზე.

მისასალმებელი სიტყვით გამოვიდნენ იაპონიის ელჩი, შოთა რუსთაველის ეროვნული სამეცნიერო ფონდის ხელმძღვანელი, კავკასიის უნივერსიტეტის ვიცე-პრეზიდენტი, მსოფლიო ბანკის წარმომადგენელი, ფრანგული ინსტიტუტის დირექტორი და საფრანგეთის საელჩოს ატაშე განათლების საკითხებში. კონფერენციის ნაწილი დაეთმო ადგილობრივი მომხსენებლების, მათ შორის სტუდენტების მხრიდან რეფორმის წინასწარ შეფასებებს და ანგარიშგების სფეროს კვლევის სხვადასხვა ასპექტებს. წარმოდგენილი ნაშრომები შეირჩა შემდგომი კონკურსებისათვის.

ღონისძიების მხარდამჭერები –  შოთა რუსთაველის ეროვნული სამეცნიერო ფონდი და ბუღალტრული აღრიცხვის, ანგარიშგებისა და აუდიტის რეფორმების მხარდაჭერის ეროვნული ფონდი.