გაიმართა სამუშაო შეხვედრა მცირე და საშუალო ზომის და IV კატეგორიის საწარმოებისთვის განკუთვნილი ფინანსური ანგარიშგების სტანდარტის შესახებ

2018 წლის 16 ნოემბერს, საქართველოს ფინანსთა სამინისტროს ბუღალტრული აღრიცხვის, ანგარიშგებისა და აუდიტის ზედამხედველობის სამსახურმა,  ბრიტანეთის მთავრობის კარგი მმართველობის ფონდის მხარდაჭერით, გამართა შეხვედრა მეოთხე კატეგორიის საწარმოთა ფინანსური ანგარიშგების სტანდარტის და თვითსწავლების დოკუმენტის, ასევე მსს ფასს სტანდარტის დანერგვის ხელშეწყობის პროექტის შესახებ. შეხვედრა მიზნად ისახავდა მეოთხე კატეგორიის საწარმოების ფინანსური ანგარიშგების ახალი სტანდარტის (GFRS) და ასევე მსს ფასს სტანდარტის (IFRS for SMEs) დანერგვის ხელშეწყობის პროექტის პრეზენტაციასა და ცნობადობის ამაღლებას.

შეხვედრის ფარგლებში, აუდიტორიის წინაშე სიტყვით წარდგნენ სამსახურისა და დონორი ორგანიზაციების წარმომადგენლები და საზოგადოებას  მსს ფასს სტანდარტების ცნობადობის ამაღლების პროექტი გააცნეს. გარდა ამისა, მათ მიმოიხილეს ისეთი საკითხები, როგორიცა: გამარტივებული ფინანსური ანგარიშგების სტანდარტის და თვითსწავლების დოკუმენტი, ანგარიშგების წარდგენის წესი და ა.შ. დასასრულს,  სამსახურის წარმომდგენლებმა მადლობა გადაუხადეს პროექტის დონორებსა და მხარდამჭერებს.
 
აღნიშნულ შეხვედრას ესწრებოდნენ ბიზნეს ასოციაციების, სავაჭრო-სამრეწველო პალატებისა და სხვადასხვა პროფესიული ორგანიზაციების  წარმომადგენლები. 
  
მსს ფასს სტანდარტის შესახებ ცნობიერების ამაღლებისათვის გამიზნული ღონისძიებები მომავალშიც გაიმართება. სამსახური მზად არის ამ მიმართულებით ყველა  დაინტერესებულ მხარესთან ითანამშრომლოს.

იხილეთ პრეზენტაციები: ბმული1, ბმული2.